أكد الملحن عزيز الشافعي، أن كل مشروع صغير أو كبير يدخل فيه يكون بالنسبة له حياة أو موت، وارتباك توتر وخوف على العمل، قائلا: "اللحظة دي بالنسبة لي من أهم اللحظات، والأغاني اللي بتطلب بيبقى تنفيذها أصعب، إنما الحاجات اللى بتطلع بشكل عفوي بتبقى اسهل".
وكشف عزيز الشافعي، خلال لقاء ببرنامج "معكم"، مع الاعلامية منى الشاذلى، على قناة on e، تفاصيل عن أغنية أنغام ومحمد رمضان في شهر رمضان الماضي، قائلا: "أغنية أنغام ومحمد رمضان كانت معمولة بلحن حد تاني وكلمات أيمن بهجت قمر وبعد كذا مقابلة محصلش اتفاق وبعدين كلموني قبل يومين من المقابلة اللي هيختاروا فيه الأغنية".
وتابع: "لحنت الأغنية في نفس اليوم وعملتها وصعوبة الموضوع أنها كانت لأنغام وأيضا محمد رمضان لأنه بيغني بطريقة تانية مختلفة خالص وكأنها مستحيلة وكل واحد لقى نفسه في الاغنية، وحصل تغيير واحد في الأغنية طلبه محمد رمضان لكن أنغام لقت اللحن من الأول".
وفي وقت سابق، كشف الملحن عزيز الشافعي، في مقطع فيديو، عبر حسابه الشخصي بموقع "انستجرام"، عن تفاصيل حذف أغنيتين للفنانة شرين عبد الوهاب قائلًا: "امبارح نزلت اغنيتين لشيرين، لكن المشكلة كنت أتمنى الأغاني تنزل بطريقة أحسن وأفضل من كدة والناس تسمعهم على اليوتيوب وكل منصات الإستماع، وبتتغنى في الإذاعة بشكل طبيعي".
واضاف : "أنا عارف شيرين عملت كده ليه.. هي وعدت جمهورها تنزل أغاني وأصعب حاجة الفنان يبقى عايز يغني ويشتغل وفجأة يتمنع عشان ورق أو توقيعات أو وجهات نظر أو مواقف قانونية، ومعرفش كان اية المفروض يحصل، لكن محامي روتانا بيقول إن شيرين دفعت 8 أو 10 مليون عشان إخلال بالعقد، وإن كل اخلال بالعقد هتدفع 10 مليون جنيه، يعني الأغنيتين بتوع امبارح شيرين ممكن تدفع عليهم 20 مليون جنيه".
وتابع: "عقد شيرين مستمر مع روتانا ومطالبة بأنها تقدم أغاني، وسؤال لمحامي شيرين هل أنت ورقك سليم عشان تنزل أغاني وإزاي لو سليم روتانا وقفته وحذفت الأغاني، هل روتانا عندها حق ولا معندهاش، ليه الأمور القانونية دي مش بتنتهي بشكل واضح، مش معقولة 2 محامين كبار يقولوا كلام عكس بعض، مشكلتنا إننا بنحب شيرين وعندنا شيرين واحدة في مصر".
وأشار: "الاستعجال في نزول الأغاني ضايقني لكن شيرين كانت مجبره على كده وأنا متفهم موقفها وبدعمها وفي ضهرها مهما حصل، المهم نسمع أغاني شيرين في كل حتة وفي كل مكان، ويارب شيرين تعدي الأزمة زي ما عدت كتير، ومقدر إنها غلطت أو التعاقد ممكن يكون في حاجة غلط وأتمنى يبقى حد كبير في القانون والمزيكا يحل الاشكالية ويدي الناس حقوقها ويخلي شيرين تشتغل وتخرج من مشاكلها الخاصة وتتكلم معانا في الفن".
إخلاء مسؤولية إن موقع عاجل نيوز يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
