إيه قصة مليارات الدولارات اللي جاية من بريطانيا للسوق المصري قريب، وهل هي متعلقة باستثمارات ولا أموال ساخنة ولا صفقة جديدة بتحصل في الكواليس.. هنقولك كل التفاصيل في التقرير ده فتابعنا للآخر.
في الساعات الأخيرة، وزير المالية أحمد كجوك وزير المالية، قابل أكتر من 200 مستثمر بكبرى المؤسسات المالية والبنوك الاستثمارية في لندن، وده حصل خلال مشاركته الأولى في اجتماعات الجمعية المصرية البريطانية للأعمال «BEBA»، وجمعية المصرفيين العرب.
ومن هنا وزير المالية، وجه رسايل مهمة جدا متعلقة بالاقتصاد المصري وخطة تعافيه، وكمان اتكلم عن مستجدات الصفقات الجديدة، وأولويات السياسات المالية والاقتصادية ضمن برنامج عمل الحكومة.
ونجح "كجوك" فعلا في تبادل الأفكار والرؤى مع مجتمع الأعمال البريطاني سواء من الشركات اللي شغالة فعليا في مصر، أو المهتمة بتوجيه أنشطتها لمصر خلال الفترة الجاية، ودي خطوة كويسة جدا نفذها الوزير، وطبعا هدفه هو جذب الاستثمارات الأجنبية من دولة بريطانيا لمصر.
ومن ضمن حديث الوزير ل 200 مستثمر بريطاني، اتكلم وشرح المؤشرات الإيجابية للأداء المالي للموازنة في شهر يونيو الماضي، واللي بيدفع الدولة المصرية لاستكمال برنامج الإصلاح الاقتصادي، ومش بس كده، اتكلم كمان عن استراتيجية خفض نسبة وأعباء الدين للناتج المحلي.
وبعد انتهاء الحديث، نجح وزير المالية في انه ينفرد بالجلوس 3 ساعات مع 60 مستثمر في 3 لقاءات متتالية، وده طبعا بيعكس اهتمامهم بضخ استثمارات إضافية في سوق المال المصري، وشرح لهم طبيعة السوق وكمان رد على كل الاستفسارات بموضوعية ومتوازنة.
كل ده بجانب الجلوس مع الشركات اللي شغالة في مصر فعليا أو لها استثمارات في البلد، وناقش طرق زيادة استثماراتها في مصر، ووعد بتقديم محفزات وفرص اقتصادية واعدة.
وكان لقاء "كجوك" مع ممثلي بورصة لندن، مختلف، لأن في اللقاء ده عبر مستثمرو الأسهم عن رغبتهم في الاستثمار بسوق المال المصري، وده إنجاز يحسب للوزير بأنه نجح في اقناعهم بالاستثمار في مصر، وأكد أن فيه محفزات كتير لكل اللي هيشتغل في السوق المصري، وإن الأولويات مع شركائنا من مجتمع الأعمال بهدف تحقيق سياسات مالية أكثر ديناميكية وتأثيرًا، خاصة أن تقييمنا لسياساتنا هيتجاوز المؤشرات المالية إلى القدرة على دفع النمو وتعزيز تنافسية اقتصادنا ودعم الإنتاج والصادرات.
وبسبب كلام وزير المالية، استجاب مستثمرون دوليون مع وزير المالية، وأبدوا إعجابهم برؤية طموحة للحكومة المصرية في تحقيق مسار اقتصادي وتنموي كبير، كمان عبروا عن نيتهم في الدخول للسوق المصري باستثمارات بملايين الدولارات، وده كله بسبب الثقة والشراكة والمساندة واليقين واللي هي اللغة اللي بينتظرها المستثمرين من أي حكومة بتسعى لجذب المزيد من التدفقات الاستثمارية، واللي هو في الأساس بقى منهج حكومة مدبولي دلوقتي عشان تنفذ البرنامج الشامل والمتكامل للإصلاح الاقتصادي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
